El Museo judio
En el museo judio de Athena
Se recojeron los restos rescapados,
Pedasos de ropa, vistidos, libros viejos y
arugados.
Los atuendos santos retornaron
A flautar cantes de relijion.
En
la escuridad de la camareta
Los candelares reflectaban un relumbror
Que aclaraba el chico medalion
Del tiempo de la nona de mi nona
Que en mi garganta tanto briyaba.
Ensupito, las venas de mi cueyo
De gritos mudos se enflamaban.
(de Cartas)
Pasos de otros siecolos
Pasos de otros siecolos,
Ruidos desconosidos suben a mis oidos,
Y no los puedo quedar:
¿Onde me topo?
Las demandas se esparsen en el aver.
Me veo volando,
Tierra y cielo me anvelopan.
Muntanias alsan sus alturas
Tocando las sesones
Que rodean buscando nido,
Sin topar reposo
Van tocando las colores
Del cosmo eternel.
(de Simientes de amor)
Labios de la ilusion
Meldo tus poesias, CAVAFI,
Para emosionarme de tu desesperasion,
De tus palabras que me fieren,
Que me retornan al sentro de la existensia
Para saber que piedri como piedrites tu
Los dulses labios de la ilusion.
(de Matriz de luz)
|
|
|
Me visto tu cara sobre la mia
A la memoria de mi madre
Me visto tu cara sobre la mia,
Y con tus ojos veo tu ermosa sivdad natal.
La tristesa y la maravilla te anvelopan
En viendo lugares que ya no los conoses
mas.
Te amostro las cayes y las forteresas,
Y espando mi mano para que tu de nuevo
Puedas las piedras tocar.
El camino me yeva verso la Tore Blanca,
Con tus jovenos pieses subo ast la punta
alta,
Y tus memorias se ajuntan a las mias.
Con tu vos me siento prononsiar nombres
Conosidos por ti,
Sus figuras se areviven cuando les conto
por tu vida,
En subito, reflecta en mis ojos tu dulse
sonrisa.
(de Matriz de luz)
En el fondo del tiempo
Cuando la escuridad
Cubrira mi cara
Y la tuya
Y vamos a flotar en lo vasio
O en los fondos cubiertos
Con montones de tiempo--
Ai, muestro esprito
Va creser eb cada letra y sinio,
Va desbrochar como un corriente de fuego,
Va ensender palabras
Piedridas entre las medianas del tiempo...
Entonses, muestros nombres
Se van a grabar en los caminos de secreto
Y van a abrir las puertas de union.
(de Matriz de luz)
|
