A LOE, nos principios e fins da educación, entre outros, sinala:

“A transmisión e posta en práctica de valores que favorezan a liberdade persoal, a responsabilidade, a cidadanía democrática, a solidariedade, a tolerancia, a igualdade, o respecto e a xustiza, así como que axuden a superar calquera tipo de discriminación”

"A educación para a prevención de conflitos e para a resolución pacífica dos mesmos, así como a non violencia en todos os ámbitos da vida persoal, familiar e social”

“A educación no exercicio da tolerancia e da liberdade dentro dos principios democráticos de convivencia, así como na prevención de conflitos e a resolución pacífica dos mesmos”
 

Real Decreto 732/1995, de 5 de maio, polo que se establecen os dereitos e deberes dos alumnos e as normas de convivencia nos centros.

Podemos definir a convivencia escolar como a interrelación entre os diferentes membros dunha comunidade educativa, que ten incidencia significativa no desenvolvemento ético, socioafectivo e intelectual de alumnos e alumnas. Esta concepción non se limita á relación entre as persoas, senón que inclúe as formas de interacción entre os diferentes estamentos que conforman unha comunidade educativa, polo que constitúe unha construción colectiva e é responsabilidade de todos os membros e actores educativos sen excepción
A convivencia é un ámbito básico para entender o tipo de relacións que se establecen nunha institución e a capacidade que esta desenvolve para comprender e acoller aos seus diversos membros. O estilo de convivencia que exista no interior de cada centro, marcará fortemente o carácter inclusivo ou exclusivo deste. Neste sentido, non se trata dun ámbito illado na vida institucional senón dunha dimensión transversal a todas as actividades e prácticas que se desenvolven no centro.
Os centros educativos son espazos privilexiados de convivencia onde se atopan culturas e actores diversos, que teñen que aprender a convivir dentro do espazo educativo común. A vida no centro é a miúdo a primeira experiencia de vida cívica dos mozos, polo que a calidade da convivencia adquire un carácter fundamental para o fortalecemento da cidadanía e a interiorización de modos democráticos, premisa que permite xerar condicións máis apropiadas para o desenvolvemento de aprendizaxes dos estudantes.